L’apparenza (lui e lei dopo 50 anni di matrimonio), di Adele Libero

E quanno ‘o tiempo passa, mamma mia,
comme cagna l’aspetto d’’ a perzona,
lle cadene ‘e capille, e p’’e malia,
s’allarga ‘a panza comme ‘o purpettone.

E pulpacce addeventano ‘na colla,
e muscole d’ ‘o pietto vanno abbascio,
‘a faccia è chiena ‘e rughe ca tracolla,
e ‘o cane ggià te tira fore ‘o vascio.

P’’a femmena è pure a stessa cosa,
allarga ‘e fianche e ‘o pietto se ne scenne,
finchè assumiglia a ‘na fronna e rosa,
ma spampinata, e addore nun ne renne.

E sulo pe’ chi te vvo bbene assaje
rieste ‘o stesso guaglione ‘e quarant’anne,
L’apparenza nun conta? E quanno maje!
L’anema sola veste ‘e stesse panne.