‘o matrimonio, di Adele Libero

‘O matrimonio è comme nu ciardino,
ce truove tante sciure e pure ‘e spine.
Inizialmente è sempe primmavera
e vase a abbracce vanno ogne matina.

Ma doppo poco cagna tutta ‘a scena
e ‘a pioggia ‘e l’autunno te turmenta,
‘o viento ammoscia tutto l’entusiasmo
‘e ‘a casa cu’ e criature te spaventa.

Si tu resiste ‘a tiempe piccerille
po’ gira ‘a rota e torna tantu sole,
crescene ‘e figlie e s’allarga ‘a famiglia
e pe’ tramente janche so’ ‘e capille.

Ma ‘ a fine cuoglie tante frutte belle,
doppo tant’anne esplode stu ciardino,
mille culure brillano int’all’uocchie
e ‘o core schioppa comme ‘o ciclamino.