ventuno luglio, di Adele Libero

E ringraziammo pure ‘o Pataterno
si manna chistu cavero asfissiante.
‘O juorno non ce passa, pare eterno,
ce sentimme na zoza tutte quante.

‘E sciure m’hanno ditto, stammatina,
mentre annaffiavo ‘e teste d’’a terrazza,
menu male ca ce pienze c’’a lattina
e ce daje l’acqua, si no ascimme pazze.

Nu signore m’ha visto, ‘o terzo piano,
se steve rinfrescanno llà ‘e‘ rimpetto.
m’’ha salutato chiano, cu na mano
asciuttanno ‘o sudore cu rispetto.

Po’ so scesa a ffa ‘a spesa trafelata
aggio accattato pizza e panzarotte,
tu ll’ he visto ca stevo già sudata,
sarrà accussì e fino a mezanotte