‘O sole ancora, di Adele Libero

E quant’è bello chisto raggio ‘e sole,
doppo tutta ‘a pioggia ‘e stammatina,
mme pare comme quanno sì piccina
e spere ca stu nniro se nne more.

Tanno attraverse e taglie ‘na muntagna,
passe pe’ strate ciento e fiume a mille,
‘a giuvintù è ‘na maglia ca nun cagna,
te fa’ sentì ‘na roccia e nun se bagna.

Po’ ‘o tiempo t’accarenza dint’all’ossa,
te dà dulure e te rallenta ‘o passo,
l’ammore cchiù nun luce dint’all’uocchie
e nun saje cchiù ‘o sapore ‘e n’ata vocca.

Allora, quanno ‘o cielo torna chiaro
e all’alba ‘o sole jesce n’ata vota,
siente ‘o cunziglio mio, jesce sicuro:
‘o sole penzarrà pure all’ammore