‘O pranzo, di Adele Libero
E doppo chesta bella passiata,
primma’e saglì facimmo ‘o ppoco ‘e spesa
l’osso po’ broro, l’accio, ‘na patata,
pure si tu vulive ‘a genovese.
‘A miezu juono scoppia ‘na granata:
m’accuse d’esse tirchia e malfidata,
pe’ tutte ‘e scale è addore ‘e bolognese,
tu sbatte ‘a porta e curre a n’ata casa!!
E sulo ‘a sera tarde t’arretire,
nu pacco sotto ‘o vraccio giallo scuro,
he’ cumprato nu pesce, staje sicuro
ca mo’ t’’o faccio olio e pummarola.
E dint’’o lietto, scappa ‘na resata,
tu ‘o ssaje ca io te voglio troppo bbene
scurdammancella sta brutta jurnata,
facimmo ampresso ca Natale vene !!
