‘O Presepe, di Adele Libero
E nu vo’ sentere raggione, Cuncettina,
pure chist’anno ha da fa’ ‘o Presepe,
o gruosso o piccerillo, ma ‘o Bambino
dint’’a grotta ce sta, stateve quiete.
Che ffa’ si po’ nun piace proprio a tutte,
e specialmente a chi nun è italiano.
Ma quanno l’Angiulille, stanche e strutte,
nun trovano a Gesù, che lle cuntamo?
E pure ‘a scola nun vonno ‘e canzone.
s’hanno accattate l’albero ‘e Natale,
e st’anno mangiarranno ‘o capitone,
a frutta secca, o pollo cu ‘e regale.
Ma st’opera facite inutilmente
Pecchè int’’o core nun tenite niente.
