‘O sole ‘e marzo, di Adele Libero

 

‘O sole ‘e marzo arriva, finalmente,

se ne fuje l’inverno malandrino,

dinto ‘o vico fanno festeggiamente,

e s’è regnuta ogne caraffa ‘e vino.

…

Quanno fa friddo s’astregnene ‘e diente,

cinche cuperte nun bastano ‘a sera,

da sotto ‘e llaste ce passano ‘e viente,

e nun se dorme, se chiagne e se spera.

…

Ma mo’, co’ tiempo bello pe’ sta via,

se balla e se joca co’ ogni raggio,

e pe’ l’estate ce sta nustalgia

ma ‘o profumo sojo ce porta maggio.

…

Pure ‘a zetella jesce mo’ cchiù spisso,

spanne bucato, chiena d’allerezza,

e ‘o core ca ritorna sempe ‘a isso,

a chell’ammore ca dette ‘na carezza.