Tramonto a Capri, di Adele Libero
Si ‘nu tramonto me putesse dare
tutt’ ‘o rosa ‘e ‘na nuvola a mare,
je me vestesse ogni juorno ‘e cielo
e te purtasse ciente mistere.
…
Ma chesta sera ‘o respiro è cchiù forte
pecchè sento aperte tutte ‘e porte,
e pure a toja, ca è stata sempe chiusa,
‘a veco aperta, comme fusse fusa.
…
Allora mentre tutto ‘o munno tace
je mo’ te prego cu nu filo ‘e voce,
te dico viene, cullame int’’e braccia
asciutta ‘e lacreme ca me porto n’faccia.
…
Si stamme ‘nzieme sulo ‘nu mumento
se ferma ‘o mare e tutto ‘o firmamento,
tremmano ‘e stelle e tremma pure ‘a luna
e comme ‘a mme maje ce sarà nisciuna.
