“‘O balcone” di Adele Libero

 

 

Stasera pe’ piglià ‘nu poco d’aria,

so asciuta ‘e corza fore a stu balcone.

Ce sta ‘na pianta ‘e rose, centenaria,

ca sta vicina all’albero ‘e limone.

…

‘E rose soje so’ sempe vellutate,

suspirano d’ammore e gelusia,

chissà qua’ primma femmena affatata

s’a’ strignette ‘o core, che puisia.

…

‘Sta casa è antica, e vere ‘o stesso mare,

ca’ mo’ s’appiccia mentre scenne ‘o sole,

chissà nu tiempo quanta marenare,

partevano sentennese ‘e murire.

…

E’ sempe ‘a stessa vita ca’ ce chiamma,

ca simme nire, janche o ciclamino,

sempe hamma girà pe’ tutto ‘o munno,

pe’ po’ turnà a chisto cielo fino!

…

E forse ‘sti fantasme da tant’anne

se ne stanno cu’ me’, fore ‘o balcone,

e se spiano quanno e ancora quanno

l’Ommo capisce o’ munno e ‘a situazione.

…

Ca’ simme comme punte piccerelle,

mullechelle dinto ‘a ‘nu piezze ‘e pane,

eppure ce crerimme uguale a’ stelle,

ca’ invece brillene …assaje luntane !!