Ce simme abbituate (Siria), di Adele Libero

 

Ce simme abbituate, ormai, ogne sera,

verimme p’’a Tv tutte sti guaje,

ggente ca more, facce fatte ‘e cera,

jugliune ca llà stanno male assaje.

 

Ma nun ce sta bannera né lenzola,

appise fore ‘a loggia pe’ prutesta,

e figlie nuoste vanno sempe a scola,

e mamme vanno a correre in palestra!

 

“Ma tu che vai dicenno, stammatina,

so’ ccose, già si sa, assaje luntane,

meglie si’ chiure ll’uocchie comme ‘a prima,

e pienze, invece, a’ e fatte a te vicine.

 

Eppure nuje chiagnimmo si nu cane

va sotto a n’autobuss e se ne more,

ma nun ce ‘mporta si l’essere umane

stanno suffrenno senza pane e ammore !!