Pasquetta nel prato, di Adele Libero
Ma che sta succerenno dint’’o prato?
Stamattina stanno tutte ‘nguttuse:
Madonna Margarita sta acquattata
comme si ‘o core suojo se fosse chiuso.
‘O marito, ‘o papavero, ha capito
e se mantene a ‘na certa distanza
‘e piccerille pure so già asciute,
e l’aria tutta è seria ‘e circostanza.
Ma a un tratto ‘o silenzio s’è stunato ,
l’aucielle ecco arrivano allarmate:
p’’a muntagna hanno visto, è sagliuto
n’’esercito ‘e famiglie entusiasmate!
Siccome ca è Pasquetta, tutte quante
mmiezo ‘e prate se vonno sbacantare,
se portane pruvviste ‘e rroba, e tanta,
e mo’ se mettene ‘o sole a mangiare !!
Gesù, povera ‘a me, fa Margarita,
mo’ me ne vengo tutta scamazzata,
si quacche scemo nun me coglie, pure,
penzanno ‘e regalarme ‘a fidanzata !
‘O papavero, l’iris, ‘e farfalle,
so’ tutte spaventate e suspettuse,
‘e sole ca se fanno mo’ ‘nu ballo
so’ ‘e furmicole: pigliene ogni cose.
‘A fine ‘e sta jurnata ‘a gente smamma
e lassa ‘o prato chine ‘e spazzatura,
Margarita è morta pe’ ‘na fiamma
e ‘o papavero lle dà ‘na sepoltura !!
