A passiata, di Adele Libero
Pecchè Napule mia è accussì bella,
ca m’è venuto, fisso, ‘nu vulio:
ca quanno moro, sempe si vo’ Dio
m’’a voglio lentamente salutà.
‘O carro hadda fa’, comme si dice,
na bella e lunga e doce passiata,
hadda passà p’ ‘e ogne cara strata
e mmiezo ‘a gente po’ m’hadda purtà.
Voglio verè ancora Via Petrarca,
Tuledo, ‘o Chiatamone, Mergellina,
m’aggia sturià ‘e nave d’’a Marina
‘o mare, ‘o cielo primma ‘e me ne ‘j !
E sulo doppo jammo ‘o cimitero,
addo’ voglio ‘na nicchia in bella vista.
Dice ma chesta po’ era n’artista?
Si, ‘nu poeta ca ve sta ‘a salutà !!
