A primma vota, di Adele Libero
A primma vota ca t’haggio ‘ncuntrato
aggio cuntato tutte ‘e stelle ‘n cielo:
tenive l’uocchie nire comm’ ‘o mare
quanno ‘e notte sta senza ‘e lampare.
…
E me guardave pure tu, rapito,
forze da chella giuvintù felice,
ca me rigneva ‘a pelle e luceva
comme rugiada n’copp’ ‘e fronne ‘e rosa.
…
E tutte ‘e duje parlaveme , distratte,
ma ‘e vvocche già tremmavano vicine,
‘e mmane già parevano ‘e ricotta
e ll’ore ‘e ll’orologio erano pazze.
…
Maje cchiù, doppo ‘stu juorno, fujemo sule,
ormaje tu respirave ‘stu respiro,
e chianu chianu ‘o munno fuje pe’ nuje
‘na connola affatata ‘n’coppo ‘o mare.
