Bambine, di Adele Libero
Comm’era bello quanno, ‘a piccerella
me mettevo ‘e vestite ‘e mamma mia.
Erano troppo gruosse, ma p’’a via
me parevano ‘a veste pe’ rignà !
Po’ quanno essa turnava dalla spesa
e me truvava tutta apparicchiata
se la faceva ‘na bella resata
e m’aiutava c’’o trucco là pe’ là.
E pure si era estate c’’o cappotto
io me ne jevo a fa’ tante discorse:
tutte ‘e suddite llà erano accorze
e ‘a Reggina ‘a stevano a omaggià.
Era ‘o juoco cchiù bello e fantasioso,
pure ‘e notte si stevo dint’’o lietto
verevo sta Riggina ‘e rimpetto
ca salutava, felice, cià cià cià.
E mo’ ca songo ‘nu poco crisciuta
e mamma mia se n’è vulata via
m’è rimasto ‘a scrivere ‘a puisia
ca è nu ricordo ‘e tanto tiempo fa !
