Nunziatina, di Adele Libero

Me guardo dint’ ’o specchio stammatina,
nun m’accunosco, sembro fatta ‘e cera,
si ‘a notte nun se dorme, è naturale,
ca sembro nu fantaseme a matina.

Nun dormo pecchè mille so’ ‘e pensiere:
maritemo, ‘e figliole, e Nunziatina,
chella cchiù bella, co’ ‘e capille nire
ca s’arretira tarde tutte ‘e sere.

Na mamma legge dint’’o core ‘e ppene,
e vere si nu chianto essa s’è fatta,
si ‘e veste mo lle vanno tanto astritto,
si na telefonata sola essa ll’aspetta.

Ma ce stongh’io, ca lle starò vicina,
pure si accanto nun ce starrà nisciuno,
e ce stongh’io ca cullerò ‘ o dulore.
E tu sarraje pe’ sempe ‘a mia creatura.

 

Annunci