‘A lettera (sonetto rinterzato), di Adele Libero

M’arriva chella lettera charmante,
doce e tutta lucente,
ca pare dint’o zuccaro impastata
pecchè l’avesse cara ed impurtante.
comm’ ‘o bbene ca siente.
E mo’ me songo, ‘o saje, entusiasmata

e chest’è ‘a primma vota, tiene mente,
ca n’’ammore ‘nnucente
m’allumma chesta vita ‘ntussecata.
E accusì vaco, maliziosamente,
senza capa, assente,
pecchè je n’ora vivo elettrizzata

sulo ‘o penziero ca me staje penzanno
e po’ me chiedo quanno
dint’’e braccia verraie. Forze dimane
a stregnerme ‘sti mane.
E mo’ p’’e tanno ‘o core sta sbattenno.

E dint’’ o mare sale ne remmane
si ‘sti parole mie nun songo vane,
si m’astrigne e me parle ,vasanno
‘o viso mio e asciuttanno
sti lacreme ca so’ comme funtane.

 

Annunci