papà Natale non viene, di Adele Libero

Gugliù ca ce po’ ffà Pappà Natale
ca vene sempe ‘a troppo luntano
purtanno chile e chile de regale
c’avite chiesto a isso ‘n’anno sano.

Passateve ‘na mano p’a cuscienza,
stracciate ampresso tutte ‘e letterine
pecchè pure ‘a Befana sta in licenza
e nun dà bambulelle, e nè trenine.

Pecchè ‘e criature mo’ so tutte ‘e juorne
ca cercano a mammà ‘a bella cosa
e ‘e mamme, pe’ s”e togliere’ a tuorno
fernesce ca c’accattano coccosa.

E allora mo’ a Natale nun fiatate
è ggià assaje si vene ‘o Bambeniello
regale allora no, nun ne scartate
sulo a papà ce date chistu ‘mbrello.