A Nazario Bruno, di Adele Libero
Addio Nazzà, te voglio salutare
cu pochi vierze chine ‘e commozione,
ma stammatina, che costernazione,
aggio saputo ca nun ce staje cchiù.
Sempre priciso, esatto, tu venive
a ddà lezione ‘e napulitano,
tranquillo, elegante, ma alla mano
sapive a lengua nosta a tu pe’ tu.
Tu ire ‘e core, ire nu pueta,
e canuscive Dante e pur l‘Inferno
ma ppo’ he’ scegliuto proprio chisto vierno
pe lassà chesta terra pure tu.
Dopo nu strazio e mille e cchiù turmiente.
Si gghiuto n’cielo senza nu cunziglio.
Napule chiagne triste n’atu figlio.
Ma llà ‘ngoppo sicuro ‘un chiagne cchiù.
