Napule ancora, di Adele Libero
E comm’è bello a cammenà p’’o vico,
si ‘o cielo è chiaro, isso è proprio scuro,
pure ogni tanto cuoglie ‘a lama ‘e sole
e pare ca te regne d’alleria
.
E tu cammine, ma tu nun sì sulo,
‘a strada addò tu passe è tutta storia,
s’aunisce ‘o presente c’’o passato
e ‘na canzone lenta regne ‘o core.
Nun può turnà mai cchiù a n’ata via:
‘o bar, o munno, ‘a casa, ‘a pizzeria.
Nun può sentì cchiù ‘e parlà italiano
Capisce sulo si è napulitano.
Si crire a me stanotte guarda ‘o mare
E ll’anema se nn’esce e va a murire.