“Annuccia” di Adele Libero

Annuccia

Era ‘a staggione de’ culure accese,

l’albere lilla, janche, oppure rosa,

e pur’essa, a criatura, era sbocciata,

doje mele mpietto, comme doje mimose.

A mamma n’zerraje n’zino stu mumento,

‘lle rette ‘e cunziglie assaje pricise:

“M’arraccumanno, nun sta cu’ ll’uocchie chiuse,

cunservete pe’ quanno sarraje sposa !”

Annuccia se vestette ‘e primavera,

bella comme ‘na pianta chiene ‘e rose,

‘a ggente attuorno se’ vutaje surpresa,

e ‘a ‘ncurunaje reggina d’ ’o paese !!

‘Sta storia già fernette doppo poco:

essa truvaje l’ammore, ma era illusa:

isso a purtaje ’na sera pe’ na scesa,

piglianno ‘o meglio e chesti fronne ‘e rosa !

E mo’ ‘a juagliona sta ca’ faccia appesa,

e chiagne juorno e notte pe’ st’ammore,

ca se n’è gghiuto justo a fine mese

e cchiù nun torna, ‘nfame e dispettuso !!