chiove, di Adele Libero

Me so’ scucciata ‘e stu cielo niro,
d’’a pioggia ca nun smette ‘e venì n’terra,
d’’o sole ca s’è chiuso dinto e ‘nzerra
‘e ragge suoie dinto a nu forziere.

‘A terra s’’è bagnata e pare lago,
‘o mare nun se vere e sta annascuso,
‘e nnuvole so’ nere e stanno spase
p’’e tutte ‘e vvie ‘e chistu paese.

E p’’e ccriature è quase nu dramma,
nun ponno cchiù jucà p’’e dint’’a piazzetta
nun tenene cchiù ‘mbrelle e arrassusia
‘a tosse e ‘o raffreddore piglia ‘mpietto.

Sperammo ca dimane arriva ‘o sole
e se ritorna a cammennà p’’a strada
ca brilla ‘a casa e’ na luce nova
e tu rituorne a me comme na fata